මෙහි ප‍්‍රදර්ශිත කෞතුක භාණ්ඩ කන්ද උඩරට රාජධානියේ ආරම්භයත් අවසානයත් සිහිපත් කරයි. ගජ ලක්ෂ්මි රූපය, කුලූනු හිස්, ඇත් රූප, පියගැට පෙළ, සඳකඩපහණ, කුවේර රූප, ශෛලමය පූජාසන, කේශර සිංහ කැටයම්, පැන් තාලිය, කොරහ, ගල් කුරාන, ගල් ආසන, ගල් උළුවස්සක උඩ පිලත, ගල් වංගෙඩිය, වැසිකිළි ගල, ඉපැරණි අම්බලම සහ ත‍්‍රස්ත ප්‍රහාරයෙන් විනාශයට පත් වූ ජාතික උරුමය ද මෙහි ප්‍රදර්ශනය වේ.

නිලංග දෑල දියවඩන නිලමේගේ සිහින සැබෑවක් වී දළදා මාලිගාවේ ආර්ථික සම්පාදනයෙන් පුරා විද්‍යා දෙපාර්තමේන්තුවේ අඛණ්ඩ අධීක්ෂණයෙන් හා විශේෂඥ උපදේශකත්වයෙන් පොහොසත්ව ගොඩනගා මෙම එළිමහන් කෞතුකාගාරය ජනතා පරිහරණයට පත් කළේය. මාලිගා එළිමහන් කෞතුකාගාරය නිදහස් පරිසරයක ගොඩනගා පැවතීම පැමිණෙන දේශීය හා විදේශීය සංචාරකයන්ට නිදහසේ කාලය ගෙවීමට ගැළපෙන නිසසල පරිසරයක් සකසාලයි. එය ගමන් විඩාව නිවාලන සැනසීමකි. නව්‍ය චිත්තාවලියකින් යුක්ත දළදා මාලිගාවේ ගිහි නායකත්වය ලෝක ප‍්‍රවණතාවන් සහ මවුවර අයිතියක් වන බිලිඳු දරුවන්ට මවුකිරි ලබා දීමේ සදාචාරයට ගෞරවයක් ව ‘මවුකිරි ලබා දෙන සුරක්ෂා ස්ථානයක්’ ද මේ එළිමහන් කෞතුකාගාර පරිශ්‍රයෙහි පිහිටුවන්න පියවර ගෙන ඇත.