දේවාල වංශ කතාවේ නව පිටුවක් පෙරළමින් ශ්‍රී ලංකාව තුළ පිහිටි ප්‍රධාන මහ දේවාල 03න් 2කම බස්නායක නිලමේ පදවියට නිලංග දෑල බස්නායක නිලමේ පත් විය. ඉක්බිතිව පවිත්‍ර ව පේවෙමින් සබරගමු මහ සමන් දේවාලයෙහි පෙරහර දින 96ක් ද රුහුණු මහ කතරගම දේවාලයෙහි පෙරහර දින 75ක් ද සුසංවිධාන කර වීදි සංචාරයේ යෙදීමට නිලංග දෑල බස්නායක නිලමේ භාග්‍යවන්තයෙකු විය.

     බස්නායක නිලමේවරයකු ලෙසින් පෙර ලත් අත්දැකීම් සමුදාය භාවිතව ධවල ප්‍රතිපත්ති යෝජනාවලියක් ප්‍රකාශයට පත් කරමින් වර්ෂ 2005 දී මහෝත්තම දළදා හාමුදුරුවන්ගේ ගිහි භාරකාරීත්වයට පත්වීමට 1931 අංක 19 දරන විහාර දේවාලගම් ආඥ පනතට අනුව ශ්‍රී දළදා මාලිගාව සඳහා දියවඩන නිලමේවරයකු තෝරා පත් කර ගැනීමේ ඡන්ද හිමිකම ඇති බහුතරයකගේ ආශීර්වාදය උපරිමයෙන් හිමි කර ගෙන හැකියාව ලද්දෙහිය. මෙය එකම කාලසීමාවක් තුළ සබරගමු මහ සමන් දේවාලය සහ රුහුණු මහ කතරගම දේවාලය යන මහ දේවාල යුග්මයෙහි බස්නායක නිලමේ පදවියට ද ශ්‍රී දළදා මාලිගාවේ දියවඩන නිලමේ පදවියට ද එකවර පත්වීම මෙරට විහාර හා දේවාල ඉතිහාසයෙහි ඓතිහාසික පදවි ප්‍රාරාප්ත වීමකි.

     නිලංග දෑල දියවඩන නිලමේ වර්ෂ 2005 සිට වර්ෂ 2015 දක්වා සිය ප්‍රථම පදවි කාලසීමාව සපුරා යළි වර්ෂ 2015 දී දෙවන වතාවට ද දියවඩන නිලමේ පදවියට පත් විය. ඒ දශක දෙකක කාලසීමාව තුළ නිලංග දෑල දියවඩන නිලමේ ශ්‍රි දළදා වහන්සේ උදෙසා පෙරහර දින 220ක් සංවිධානය කර වීදි සංචාරයේ යෙදීමට පින්වන්ත විය. 

     නිලංග දෑල දියවඩන නිලමේගේ රාජකාරි වික්‍රමවල පෙර දැක්ම ලෙස 2005 ජූලි මහේ රුහුණු කතරගම මහ දේවාලයේ පෙරහර ද 2005 අගෝස්තු මහේ සිරි දළදා පෙරහර ද 2005 අගෝස්තු මහේ ම සබරගමු මහා පෙරහර ද එකම වර්ෂයක මාස දෙකක් තුළ සාර්ථක ව නිමාවට පත් කර පෙන්නුම් කළේ ය.

     මේ අනුව නිලංග දෑල දියවඩන නිලමේ සිය ජීවිත කාලය තුළ දින 391ක් පෙරහරවල වීදි සංචාරය කර ඇති අතර, එය ලාංකේය පෙරහර ඉතිහාසය තුළ විද්‍යමාන වන දුලබ අරුමයකි.